Extraits de la lettre patente de François 1er à l’adresse de Jean François de la Roque de Roberval en date du 7 février 1540 :
"... pour l’augmentation de nostre saincte foy chrestienne et accroissement de nostre mère saincte église Catholique et aultres bonnes et justes causes... constituons, ordonnons et establissons nostre ainé et féal Jehan Françoys de la Roque, seigneur de Roberval nostre lieutenant général Chef et Directeur de certaine armée que voulons envoyer en brief et par lui estre menée es divers pays transmarins et maritimes tant en Canada, Ochelaga, Saguenay que aultres pays non possedez par aulcuns princes chrestiens..." [...]
"Voulons user de miséricorde faire œuvre pitoyable et méritoire envers aulcuns criminels et malfaiteurs... avons adviser de faire bailler et délivrer à nostre dict lieutenant ses commis et depputez jusques a tel nombre qu’il advisera des dictz criminels et malfaiteurs détenus ès prisons et conciergeryes de nos parlemens et aultres jurisdiction et telz qu’il semblera à luy ses commis ou depputez estre utiles et nécessaires..." [...]
"... commuons les peines de mort en voiaige honneste et salutaire a la charge que ou les dicts prisonniers s’en retourneront du dict voyaige sans permission expresse de nous ils seront executez de la peine ou laquelle ils auraient été condamnez incontinent et sans espérance de grace reservant toutes fois cy après à nous de leur faire grace du dict voyaige après qu’ils auront servy en icelluy selon le debvoir qu’ils y auront faict suyvant le rapport que nous voulons nous estre faict par nostre lieutenant..."